البــريء ( قصة خيال علمي

الـمشهد الاول :
أنطلق رنين الهاتف فى ذلك الوقت المتاخر من الليل ليشق ذلك السكون المطبق حول ذلك القصر المنيف فى منطقة مدينة نصر الراقيه بالقاهره. أنتفض صاحب القصر من فراشة فى انزعاج و هوه يسب و يلعن و نظر فى ساعة الحائط و اخذ يتسائل عن ذلك الحمار اللذى يتصل فى الثانية صباحا.
- هـاااااا الوووو ؟
- أ … أ ايوة يا باشا
- ايه يا حيوان مش عارف انى راجع من سهره و عايز اناااااام !
- كارثة يا باشا كارثة !!!
- ايه اللى حصل يا غراب البين ؟!
- احم …. العباره ( الجحيم 97 ) خرجت من ميناء ضبا و قبل ما توصل ميناء سفاجا غرقت.
- نهار اســود !!
- و الدنيا مقلوبة و الناس بتصرخ فى ميناء سفاجا و طالبين راس سعادتك
- بوووم !!!!
- الووو ؟! انته معايا يا باشا ؟؟!!

*******************
المشـهد الثانى :
جلس ( ممنون باشا ) على رأس اجتماع مجلس ادارة شركة(الجحيم) للنقل البحرى – بعد افاقته من حالة الاغماء اللتى اصابته- و هوه يرغى و يزبد
ممنون باشا : دي كارثة ! ازاى العباره تغرق يا بهايم ؟!
أحد المديرين : سعادتك عارف يا ممنون باشا ان العباره احم .... كان المفترض تتحال للمعاش من 11 سنة فاتت لولا حبايبنا فى في هيئة السلامه البحريه و ده قضاء و قدر يا باشا و سيادتك راجل مؤمن !
ممنون باشا ( يصرخ فى جنون ) : ايـــه ؟! . طيب مهو العباره بتاعتنا اللى اسمها ( الجحيم 96 ) صلاحيتها انتهت من 20 سنه و رغم كده شغاله تمام و فيها البركه !
مدير اخر : و اللى يغيظ اكتر ان المسؤلين فى الحكومة طلبوا من هيئة السلامه البحريه تحقق في الموضوع !!
ممنون باشا : سيبك سيبك انا عارف النتيجة و مش حايهمنى اى حاجة طالما الكبير راضى عنى
المدير: و العمل يا باشا ؟
ممنون باشا : مش عايزاى حد فيكم يتكلم عن الموضوع ده فى الصحافة او فى الاعلام او حتى مع مراته في البيت و ألا حيشوف منى تعذيب ولا تعذيب كفار مكة ! و انا حتصرف يلا يا بهوات الاجتماع انتهى .
********************
المشـهد الثالث :
* ممنون جالس على مقعد مكتبه و يسند مرفقيه على المكتب و يشبك اصابعه حول رأسه – كناية عن التفكير بحكمة و عمق – و فجأه وثب كالملسوع قائلا : وجدتــها !!
و امسك بهاتف المكتب و طلب رقم يعد من الارقام السرية فى دولتنا المجيدة و انتظر قليلا ثم صاح :
ممنون : اهلااااااااااااااان ( زيزو ) حبيبى و بن حبيبى
زيزو : اهلا اهلا ( مومو ) باشا عامل ايه يا جميل ؟
ممنون : والله يا زيزو ياخويا الدنيا مقلوبة عليا . بس انته صحيح مختفى فين كل ده ؟؟؟
زيزو : أبدا أبدا انته عارف حساسية موقعى و ان انا لازم افضل موجود في الظل , لكن صحيح الدنيا مقلوبة ليه يا مومو ؟
مومو : أبدا يا سيدى , عباره من العبارات اللى انا مالكهم غرقت فى البحر الاحمر . كان عليها 1400 مواطن و نجا منهم حوالى أ ... احم 200 بس !!
زيزو : ياااااااه !! مش عيب نبقى بلد تماسيح النيل و يكون 1200 مواطن مش بيعرفوا يعوموا ؟ !! دى فضيحه علي جبين الوطن و الرياضة القومية صدقنى يا مومو يا حبيبى مش حيكفى فيها على الاقل غير طيران وزير الشباب و الرياضة الحالى من موقعة جزاءأ وفاقأ على اهماله الشنيع ده , لكن صحيح انته لهجه كلامك اديتنى احساس انك متضايق هوه فى ايه ؟ ! صارحنى ده انا زيزو حبيبك .
مومو : اه , أصل انا زعلت اوى عشان كان فى قصر شيك فى جزر الكنارى كنت ناوى اشتريه بس ما حصلش نصيب و صاحب القصر رجع فى كلامه .... اصل جاله عرض من واحد من ( اثرياء النفط ) و عمل عرض مغرى و لطش القصر منى. !
زيزو : يلا معلش تتعوض يا جميل.
مومو : صحيح . بقالك 4 أيام مختفى فين ؟
زيزو : أصل عقبال عندك ( تامر ) حفيدى اشترى ( سى دى ) لعبة تجنن فى البلاىستيشن و من وقتها و انا بلعب فيها لدرجة ان مراتى هددتنى بانها حتخلعنى لو عشان ابطل اللعبة دي .
مومو : - يضحك ضحكات صافيه مثل طفل رضيع –
زيزو : لا و ايه بقى الباشا الكبير لما عرف بموضوع اللعبة حلف طلاق 3 انه لازم ييجى يلعب معايا زوجى و ألا حيصدر قانون يعتبر فيه اي شخص بيحوز جهاز بلاىستيشن بيتجسس على البلد لصالح اولاد العم ! بس الحمد الله لولا طاقم الحراسة الخاص بالباشا الكبير اعترض على الزيارة بسبب دواعى الامن الغير مستتب قرر الباشا المؤمن يصوم 3 لولا كده كان زمانه شغال يكسبنى فى اللعبة كل شويه عن طريق حكمته و حنكته و مهارته و لياقته و جماله و دلاله أ... ما علينا.
مومو : سيبك من ده كله و قولى اعمل ايه فى موضوع العباره دى ؟
زيزو : ولاااااا يهمك أنته معتمد علي Real Man روح بيتك و نام و انته مطمن .. صحيح مراتى بتقولك سلم على ( طانط صافيناز ) .
مومو : بالرغم ان مراتك اكبر من مراتى ب 20 سنة الا انها مصممه تقولها يا ( طانط ) سبحان الله بجد يعنى ... عموما ماشى يا سيدى سلام دلوقتى .
*********************
المشـهد الرابع :
مصر فى حالة غليان . ارتفع صراخ الشعب مطالبا بالقصاص العادل . و كان الجو السائد فى المجلس الموقر لا يوحى بالطمانينة .
نواب الاخوان المسلمين ثائرون و يطالبون برد فعل حاسم و شامل و رفع الحصانة البرلمانية عن ممنون
و نواب الحزب الحاكم منقسمون ما بين مؤيد لرأي التيار الاخوان المسلمين ( فى الخفاء بالطبع ) و ما بين رافض لمبدأ رفع الحصانة من أساسة .
رئيس المجلس يتكلم بهدوئه الشهير قائلا :
الموافق على ارجاء موضوع رفع الحصانة عن العضو ممنون لما بعد ظهور نتيجه تقرير الخبراء بخصوص اسباب الحادث فاليتفضل برفع يده !! ؟ مواااااااافقة ..... رفعت الجلسة
**********************
المشـهد الخامس :
فى مطار القاهره ممنون يستعد للحاق بالطائرة المتجهه الى لندن و يتجه الى الضابط المسؤل عن الجوازات و يناولة جواز السفر.
الضابط يهمس من بين دموعه : والله مصر من غيرك حتبقى ضلمه يا ممنون باشا .
ممنون يقول في حسرة : لولا انى مريض و لازم اتعالج فى لندن يا حودة ما كنتش سبت بلدى و لا اهل بلدى.
الضابط : و سيادتك بتشتكى من اية يا ممنون باشا ؟
ممنون : كل ما ادخل الحمام اسمع صوت موج بحر فى ودانى مش عارف ايه السر !! لغاية ما قربت اتجنن .
روحت لدكتور كان قليل الادب شويه ال ايــه ان نتيجة ان ضميرى مش حاسس بالذنب قام الذنب هجم على ودنى !!
الضابط يقهقه قائلا : و ده عملت معاه ايه ؟
ممنون : وصت عليه واحد من معارفى فى وزارة الصحة و نقلوه مستوصف مدينه ابو ترتر
الضابط : دى فين دى ؟
ممنون : قبل ليبيا بـ 10 كيلو !!
و الدكتور التانى قال ايه ؟
ممنون : قال ان حالتى دى مش جديدة و الدكاتره بيسموها ( اعراض مع بعد الكارثة ) و علاجها الوحيد السفر لبريطانيا او سويسرا او اى بلد غير عربى عموماو اهو بالمره الواحد يتعالج و يستجم في نفس الوقت.
الضابط : يلااااا حصل خير يا باشا , اتفضل جواز السفر مختوم اهه و رحلة سعيده ان شاء الله
********************
المشـهد السادس :
المجلس الموقر يقرر رفع الحصانة عن النائب ممنون و ادراج اسمه فى قائمة الممنوعين من مغادرة البلاد تمهيدا لسؤاله عن مدى مسؤليته في حادث العباره بصفته مالكها !!
********************
المشـهد السابع :
- الاعلان عن انتشال الصندوق الاسود الخاص بالعباره المنكوبه و يقوم المصورين بالتقاط الصور للوزير المسؤل و هوه يحمل الصندوق و يبتسم ابتسامه بلاستيكية كمن يحمل علبة بسكويت جديد تم طرحه في الاسواق .

*****************
المشـهد الثامن :
- الوزير المسؤل بدا عليه التوتر و القلق و عمال الاستوديو فى مبنى الاذاعة و التليفزيون يركضون هنا و هناك أستعدادا لساعة الصفر و ها قد حانت.
المخرج : اكشاااااااااااااان يا معالى الوزير
الوزير : بنى وطنى , اجتازت مصر فى الفترة الاخيرة من تاريخها أ .... احم اٌقصد بفضل توجيهات السيد رئيس الجمهورية تم انتشال الصندوق الاسود الخاص بالعباره – فاكرينها ؟؟ !! – و اخيرا بتحليل البيانات و المعلومات اللتى يحتوى عليها الصندوق تبين لنا الاتى
ان سبب الحريق كان نتيجة انفجار ( وابور جاز ) يمتكله احد المواطنين من مستقلى العباره و لكن بالتدقيق اكثر تبين ان السبب كان بسبب ( صاروخ عيد ) صينى المنشأ مما يبعث الشك فى احتمال وجود مؤامرة صينية –مغولية
تبين ايضا ان الخطأ الرئيسى يقع على عاتق قبطان العباره وحده – الف رحمة و نور عليه-
تكذيب الاشاعات المغرضة اللتى اطلقها بعض الدول الغربية الحاقدة بخصوص ان قاعدة عسكرية في شمال بريطانيا التقطت رسالة استغاثة صادره من العباره المنكوبة لسبب بسيط لان العبارة ليس بها جهاز لاسلكي من اساسه !!
الاستاذ المحترم الفاضل ممنون صاحب الشركة مالكة العباره بريء براءه شارون من دماء العرب و الخوارج
دعــواتكم للاستاذ المحترم ممنون بسرعة الشفاء العاجل و العوده قريبا الى ارض الوطن0
نصحية لكل مصرى : اتعلموا السباحة
- و ههكذا ختم السيد الوزير البيان الاعلامى و عاد الى منزله مطمئن البال و نام قرير العينين مرضى الضمير!!
*******************
المشـهد الاخير :
خبر نشر فى مجلة The Observer الانجليزية ذائعة الصيت تتحدث عن الملياردير المصرى ( ممنون سماعين ) اللذى قام بأفتتاح شركة للنقل البحرى بين فرنسا و انجلترا عن طريق بحر المانش.
- تـــمـــت